«Փաշինյանը փորձում է ապացուցել, որ երկիրն էլ է սկսել մոռանալ 5000 զոհերի մասին»․ Միքայել Մինասյան

Սուրբ Աթոռում ՀՀ նախկին դեսպան Միքայել Մինասյանն իր Թելեգրամ-ալիքում գրել է. «Ինձ զարմացնում է Նիկոլի՝ հոգեկան խանգարման հասնող ձգտումը՝ ցույց տալ, որ ոչինչ չի պատահել, նոյեմբերի 9-ին նա կապիտուլյացիա չի ստորագրել, Շուշին չի հանձնել, չի սպանել 5000 հոգու։ Նիկոլը փորձում է ապացուցել, որ երկիրն էլ է սկսել այդ մասին մոռանալ։ Որպես հաստատում՝ նա հայտարարել է, որ փետրվարի առաջին 15 օրվա ընթացքում ավելի շատ ՀԴՄ կտրոն է տպվել, քան նախորդ տարվա նույն ժամանակահատվածում։
Նույնիսկ եթե ճիշտ է, դա ոչինչ չի նշանակում: ՀԴՄ կտրոնների քանակի ավելացումը ֆինանսական կայունության ցուցանիշ չէ։ Դա ակնհայտ է անգամ հարբած էկոնոմիկայի նախարար Վահան Քերոբյանին, ով «տնտեսական ակտիվության» մասին՝ Նիկոլի հայտարարություններից մի քանի ժամ առաջ այլ հայտարարություն էր արել՝ երկրում աղետալի տնտեսական իրավիճակի մասին։
Մենք պետք է հասկանանք, որ Նիկոլն ու նախարարը միմյանց չեն հակասում։ Նրանց համար ամենևին էլ կարևոր չէ, թե իրականում ինչ է կատարվում երկրում, նրանց համար կարևոր է համեմատաբար ճշմարտանման ինչ-որ լավատեսական բան հորինել՝ հուսալով, որ անգրագետ զանգվածները կհավատան իրենց։
Հիշե՛ք Արծրունի հաղթական զեկույցները»։