Փաշինյանը հայտարարել է ռուսական «Իսկանդերների» անաշխատունակության մասին․ #Lenta

ՀՀ վարչապետ Նիկոլ Փաշինյանը հայտարարել է ռուսական «Իսկանդեր» օպերատիվ-մարտավարական հրթիռային համալիրների անաշխատունակության մասին, գրում է ռուսական Lenta.ru կայքը՝ հղում անելով Փաշինյանի՝ 1in.am-ին տված հարցազրույցին։

«Այսպես Փաշինյանը պատասխանել է ՀՀ նախկին նախագահ Սերժ Սարգսյանին, ով հայտարարել էր, որ «Իսկանդեր» կկիրառեր Լեռնային Ղարաբաղում պատերազմի արդեն 4-րդ օրը։ Սարգսյանը նաև հետաքրքրվել էր, թե ինչո՞ւ այդ համալիրներով չեն խոցվել Ադրբեջանի նավթագազային օբյեկտները։
Իր հերթին վարչապետն ասել է, որ ռուսական հրթիռները «օգտագործման համար պիտանի չեն» և «ամբողջությամբ չեն պայթում»»,-գրել է Lenta-ն։
«Թող Սարգսյանը պատասխանի, թե ինչո՞ւ «Իսկանդերը» չի պայթել կամ ինչո՞ւ է պայթել 10%-ով»,-մեջբերվել է Փաշինյանի հարցը։
Պարբերականը նշում է, որ հունվարին Известия-ն՝ վկայակոչելով Ռուսաստանի Պաշտպանության նախարարության աղբյուրները, հայտնել էր, որ «Իսկանդեր» օպերատիվ-մարտավարական համալիրների ուղղորդման համար կօգտագործվեն հետախուզական անօդաչու թռչող սարքեր (ԱԹՍ)։