«Իր ձախողման համար Փաշինյանը փորձում է արդարանալ արևմտյան գործընկերների աչքում»․ Սիվկով

Փաշինյանը քաղաքական պատճառներով է «Իսկանդերների» մասին արտահայտվել՝ փորձելով իր ձախողման համար արդարանալ արևմտյան գործընկերների աչքում, ВЗГЛЯД-ին ասել է ռազմական փորձագետ Կոնստանտին Սիվկովը՝ մեկնաբանելով ՀՀ վարչապետ Նիկոլ Փաշինյանի հայտարարությունն այն մասին, որ Լեռնային Ղարաբաղում ռազմական գործողությունների ընթացքում «Իսկանդերը» չի պայթել կամ պայթել է միայն 10%-ով»:
«Լեռնային Ղարաբաղում հակամարտության ընթացքում «Իսկանդեր» համալիրների օգտագործման վերաբերյալ տվյալներ չեն ստացվել։ Ընդ որում, Ադրբեջանի տարածքում ընկած հրթիռները բոլորին հայտնի են։ Բաքուն ցուցադրել է դրանք»,-ասել է ռազմական գիտությունների դոկտոր Կոնստանտին Սիվկովը։
Փորձագետը պարզաբանել է, որ «Իսկանդերներն» իրենց չափերով բավականին մեծ համալիրներ են։ «Դա նշանակում է, որ դրանց ընկնելը չէր կարող աննկատ լինել հակառակորդի համար։ Քանի որ Ադրբեջանը չի ցուցադրել իր տարածքում ընկած այդ տիպի հրթիռները, մենք կարող ենք եզրակացնել, որ նման դեպք չի եղել»,–հայտարարել է զրուցակիցը։
«Բացի այդ, դժվար թե Ադրբեջանի տարածքում հայ փորձագետներ են աշխատում, որոնք վերլուծում են այնտեղ ընկած հրթիռների վիճակը և այդ մասին զեկուցում Փաշինյանին»,-ասել է փորձագետը:
Վերլուծաբանը հիշեցրել է, որ «Իսկանդերներն» արդյունավետ են կիրառվել Սիրիայում. «Ուստի Հայաստանի ղեկավարը հրթիռների վատ որակի մասին ոչ մի ապացույց չունի»,–ընդգծել է ռազմական վերլուծաբանը:
«Բացի այդ, Լեռնային Ղարաբաղում պատերազմի ավարտից անցել է արդեն 3,5 ամիս, և այդ ամբողջ ընթացքում ոչ ոք չի խոսել ռուսական զինատեսակների որակի մասին։ Ինչու հանկարծ Փաշինյանը սկսեց այդ մասին դատողություններ անել։ Ես այստեղ միայն քաղաքական միտում եմ տեսնում։ Ձախողման համար նա փորձում է արդարանալ իր արևմտյան գործընկերների աչքում»,-ամփոփել է զրուցակիցը։