Աշխարհում յուրաքանչյուր 3-րդ կին բռնության է ենթարկվում. ԱՀԿ

Մոտ 736 միլիոն կին կամ կանանց 1/3-ն աշխարհում ֆիզիկական կամ սեռական բռնության է ենթարկվել տղամարդկանց, այդ թվում՝ զուգընկերոջ կողմից։

Այս մասին հաշվետվություն է ներկայացրել Առողջապահության Համաշխարհային կազմակերպությունը (ԱՀԿ)։
Փաստաթղթում նշվում է, որ աշխարհում յուրաքանչյուր 3-րդ կին ենթարկվում է բռնության: Ընդ որում, վերջին տասնամյակում այդ թիվն անփոփոխ է։
Միևնույն ժամանակ, 15-24 տարեկան 4 կանանցից առնվազն 1-ը զուգընկերոջ կողմից բռնության է ենթարկվել:
«Միլիոնավոր կանանց նկատմամբ բռնության խնդիրը բնորոշ է յուրաքանչյուր երկրին ու մշակույթին, ինչը խորանում է COVID-19 համաճարակի հետևանքով: Սակայն, ի տարբերություն կորոնավիրուսի, այն հնարավոր չէ կանգնեցնել պատվաստանյութով։ Մենք կարող ենք պայքարել դրա դեմ միայն կառավարությունների, համայնքների և անհատների համակարգված ջանքերի, կանանց և աղջիկների հնարավորությունների ընդլայնման, առողջ և փոխադարձ հարգալից վերաբերմունքի շնորհիվ»,-հայտարարել է ԱՀԿ տնօրեն Թեդրոս Գեբրայեսուսը։
Ամբողջ աշխարհում կանանց նկատմամբ բռնության ամենատարածված ձևն ինտիմ զուգընկերոջ կողմից դաժան վերաբերմունքն է: Ընդ որում, ստացված տվյալների համաձայն, աշխարհում կանանց 6%-ը սեռական բռնության է ենթարկվում այն անձանց կողմից, որոնք չեն հանդիսանում նրանց ամուսինը կամ զուգընկերը: Իրական ցուցանիշը կարող է զգալիորեն ավելի բարձր լինել՝ հաշվի առնելով սեռական բռնության դեպքերի ոչ լիարժեք գրանցումը։