Պաշտպանը Սերժ Սարգսյանի գույքի վրա դրված կալանքը վերացնելու մասին միջնորդություն ներկայացրեց դատարան

Այսօր՝ Սերժ Սարգսյանի գործով դատական նիստի ժամանակ, պաշտպան Ռուբեն Հակոբյանը Սարգսյանի գույքի վրա դրված կալանքը վերացնելու մասին միջնորդություն ներկայացրեց դատարան։
Ռուբեն Հակոբյանի խոսքով՝ քննիչը Սերժ Սարգսյանի գույքի վրա կալանք է դրել պատճառաբանությամբ, որ երրորդ նախագահը նախկինում զբաղեցրել է բարձր պաշտոններ պետական մարմիններում, դրանից բխող կենսափորձ է ունեցել, և ունեցած կապերը հիմք են տալիս ենթադրելու, որ իրեն վերագրվող արարքի բնույթից և վտանգավորության աստիճանից ելնելով՝ նա կարող է անձամբ կամ միջնորդավորված եղանակով թաքցնել, օտարել սեփականության իրավունքով իրեն պատկանող գույքը։
Սերժ Սարգսյանի գույքի վրա կալանք դնելու մասին քննիչի որոշումը պաշտպանը համարեց ոչ իրավաչափ։
«Քննիչի որոշման դեմ բողոք ենք ներկայացրել առաջին ատյանի դատարան, որը մերժվել է, բողոք ենք ներկայացրել են ՀՀ վերաքննիչ դատարանը, որը նույնպես մերժվել է, այնուհետ բողոք ենք ներկայացրել ՀՀ վճռաբեկ դատարան, որի որոշումը դեռևս չկա»,- նշեց Հակոբյանը։

Դատավորը հայտնեց, որ միջնորդության պատասխանը կհրապարակվի վաղը՝ մարտի 19-ին։

Դատական նիստը հետաձգվեց։ Հաջորդ նիստը տեղի կունենա սույն թվականի ապրիլի 15-ին՝ ժամը 10։00-ին։