Մակունցը՝ արտահերթ ընտրությունները փոփոխված օրենսգրքով անցկացնելու մասին

««Իմ քայլը» խմբակցությունը հակված է Ընտրական օրենսգրքում ամբողջապես համամասնական համակարգին անցում կատարելու փոփոխություններն ընդունելուն և համամասնական ընտրակարգով արտահերթ ընտրություններին գնալուն»,- այսօր լրագրողների հետ ճեպազրույցում հայտարարեց «Իմ քայլը» խմբակցության ղեկավար Լիլիթ Մակունցը՝ նշելով, որ այս պահին ընթանում են քննարկումներ։

Հարցին, թե ում հետ են քննարկումներն անցկացնում, Մակունցը պատասխանեց․ «Քննարկումը ներառում է Ընտրական օրենսգրքի փոփոխությունների մասին տարբեր սեգմենտներ։ Փաթեթը եղել է բավականին ներառական և դրան բավականին ուժեր են մասնակցել, էնպես որ, առաջին հերթին հենց քննարկումներին մասնակցածների մասին է խոսքը»։

Հարցին, թե միայն համամասնական ընտրակարգին անցնելու դրո՞ւյթն են պատրաստվում փոխել, թե՞ ամբողջովին, «Իմ քայլը» խմբակցության ղեկավարը պատասխանեց․

«Այս պահին վերջնական ոչինչ չեմ կարող ասել, ոչինչ չեմ բացառում»։