Չինաստանի ԱԳ նախարարը մեկնաբանել է Պեկինի դեմ ԵՄ պատժամիջոցները

Չինաստանի դեմ Եվրոմիության միակողմանի պատժամիջոցները բացարձակ անօրինական են, հայտարարել է ՉԺՀ ԱԳ նախարար Վան Ին:

ԵՄ ԱԳ նախարարները երկուշաբթի համաձայնեցրել են Չինաստանի 4 քաղաքացիներին և 1 կազմակերպությանը՝ մարդու իրավունքների խախտման մեղադրանքով պատժամիջոցների ցուցակում ընդգրկելը: Չինաստանի ԱԳՆ-ն ի պատասխան պատժամիջոցներ է սահմանել 10 եվրոպացիների, այդ թվում՝ Եվրոխորհրդարանի պատգամավորների, ինչպես նաև 4 կազմակերպության դեմ:
«Ցանկացած միակողմանի պատժամիջոց միջազգային իրավունքի հիմքեր չունի, այդ թվում՝ օրերս ԵՄ-ի կողմից Չինաստանի դեմ սահմանված պատժամիջոցները։ ԵՄ-ը չպետք է նման քայլեր ձեռնարկի, որոնք խախտում են միջազգային իրավունքը»,- հայտարարել Է Վան Ին՝ ՌԴ ԱԳ նախարար Սերգեյ Լավրովի հետ բանակցությունների արդյունքներով կայացած մամուլի ասուլիսի ժամանակ:

Նա հավելել է, որ չինական կողմի տվյալներով՝ ԵՄ-ի ներսում ոչ բոլորն են համաձայն պատժամիջոցների քաղաքականության հետ։ «Նրանք չեն ստանա միջազգային հանրության աջակցությունը, հատկապես, այսպես կոչված, ստի հիման վրա սահմանված պատժամիջոցների դեպքում։ Ես կարծում եմ, որ բոլոր երկրները պետք է դեմ դուրս գան դրան»,- ընդգծել է Չինաստանի ԱԳ ղեկավարը։