«Ռուսաստանն ագրեսիվ քաղաքականություն է վարում». ՆԱՏՕ-ի գլխավոր քարտուղար

Վերջին տարիներին Ռուսաստանն ագրեսիվ քաղաքականություն է վարում ինչպես երկրի ներսում, այնպես էլ դրա սահմաններից դուրս։ Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը։

Նրա խոսքով՝ Ռուսաստանը վերջին տարիներին ագրեսիա է դրսևորում իր հարևանների նկատմամբ, ինչպիսիք են Վրաստանն ու Ուկրաինան, միջամտում է ՆԱՏՕ-ի դաշնակիցների ներքաղաքական գործընթացներին, ճնշում է գործադրում երկրում ընդդիմադիրների վրա:

«Եվ սա դեռ ամենը չէ։ Ռուսաստանի նախագահ Վլադիմիր Պուտինը, իհարկե, պատասխանատու է Ռուսաստանի գործողությունների համար։ Մենք տեսնում ենք ագրեսիվ վերաբերմունքի մոդելը։ Դրանք ներառում են ընդդիմադիրների ֆիզիկապես վերացումը և սպանության փորձերը. բացի այդ, ՆԱՏՕ-ում մտահոգված են այն հաղորդագրություններով, որ Ռուսաստանը պարգև է սահմանում Աֆղանստանում՝ դաշինքի զինծառայողների սպանության համար»,- ասել է ՆԱՏՕ-ի գլխավոր քարտուղարը։