«Հոգևոր վանդալիզմի հերթական դեպքը Երևանում». Սուքիաս Թորոսյան

Ծաղրանկարիչ, նկարիչ Սուքիաս Թորոսյանը ֆեյսբուքյան իր էջում գրել է. «Հոգևոր վանդալիզմի հերթական դեպքը Երևանում. Կոմիտասի անվան պանթեոնի հարակից տարածքից գողացել են 20-րդ դարասկզբի հայ բանաստեղծուհի Շուշանիկ Կուրղինյանի կիսանդրին, որը տեղադրված էր նրա գերեզմանին: Կիսանդրու հեղինակն էր հանդիսանում հանրահայտ քանդակագործ Սարգիս Բաղդասարյանը: Նշենք, որ այս տարածքը Երևանի Մլեր կոչվող նախկին քաղաքային գերեզմանատունն է եղել, որտեղ 19-րդ դարավերջին և 20-րդ դարասկզբին թաղվել են նաև հայ երևելիները, այդ թվում՝ 1918-ի Սարդարապատի հերոսամարտի և 1921-ի Փետրվարյան ապստամբության հերոսները (ներկայումս նրանց գերեզմանների հետքերը կորսված են):
Վանդալիզմի դեպքի մասին տեղեկացնում է ՀՀ ԿԳՄՍ նախարարության «Պատմամշակութային արգելոց-թանգարանների և պատմական միջավայրի պահպանության ծառայությունը»: Հիշեցնենք նաև, որ շաբաթներ առաջ Երևանի Օղակաձև զբոսայգում բարբարոսաբար թալանվել էր հայ մեծանուն բարեգործների ծառուղու արձանախումբը»: