Սիլվիո Բեռլուսկոնին հոսպիտալացվել է

Իտալիայի նախկին վարչապետ Սիլվիո Բեռլուսկոնին երկուշաբթի օրվանից գտնվում է հիվանդանոցում։ Այս մասին հայտնում է Ansa գործակալությունը՝ հղում անելով քաղաքական գործչի փաստաբան Ֆեդերիկո Չեկոնիին։

84-ամյա Բեռլուսկոնին հոսպիտալացվել է մարտի 22-ի առավոտյան։ Ինչպես գրում է La Repubblica-ն, պաշտպանը հայտնել է Միլանում դատական նիստի ժամանակ իր հաճախորդի առողջության վատթարացման մասին: Նախկին վարչապետը և ևս 28 մարդ կոռուպցիայի և կեղծ վկայության գործով մեղադրյալներ են հանդիսանում։
Պարբերականի տեղեկություններով՝ Չեկոնին ցանկացել է, որ «արձանագրությունում նշված լինի, որ Բեռլուսկոնին երկուշաբթի առավոտից հիվանդանոց է տեղափոխվել առողջական խնդիրների պատճառով»: Սակայն քաղաքական գործչի պաշտպանները չեն խնդրել հետաձգել դատական նիստը, ուստի գործի քննությունը շարունակվում է։