«Այս թեման պետք է փակ լինի. չպետք է ջուր լցնել թշնամու ջրաղացին». Տավուշի մարզպետ

Այսօր լրագրողների հետ զրույցում՝ պատասխանելով հարցին, թե ի՞նչ իրավիճակ է Տավուշի սահմանին և ինչո՞ւ էին վերջերս ռուս խաղաղապահներն այցելել Իջևան, Տավուշի մարզպետ Հայկ Չոբանյանն ասաց, որ սահմանին ամեն ինչ հանգիստ է, սահմանային փոփոխության որևէ քննարկում չի եղել: «Ինչ վերաբերում է զինծառայողների այցելությանը Տավուշի մարզ, դա մշտական բնույթ ունի, կապված է Պաշտպանության նախարարության ֆունկցիաների, գործողությունների, իրենց պարտականությունների կատարման հետ: Մնացած հարցերով խնդրում եմ դիմեք Պաշտպանության նախարարությանը կամ Գլխավոր շտաբին»,- նշել է մարզպետը:

Տավուշի մարզից շրջաններ հանձնելու լուրերին ի պատասխան Չոբանյանն ասել է. «Ես բացառում եմ Տավուշի մարզից շրջաններ հանձնելու գործընթաց որևէ մեկի կողմից՝ մինչև գոնե ես կլինեմ այնտեղ պատասխանատու և ես կապրեմ այս երկրում: Եվ եթե Տավուշի մարզի սահմանին որևէ վտանգ լինի, առաջինը ես կանգնած կլինեմ սահմանին՝ այն չեզոքացնելու: Հայ ժողովրդի և Հայաստանի համար այս թեման պետք է փակ լինի, քննարկման առարկա չլինի»,- ասել է Տավուշի մարզպետը՝ հորդորելով «նման խոսակցություններով թշնամու ջրաղացին ջուր չլցնել»: