«Ինչի՞ մասին է խոսում ԱԽ քարտուղարը, եթե Թուրքիայի հետ որևէ բանակցություն չկա». լրագրողը՝ ԱԳ նախարարին

«Ուզում եմ ասել, եթե Արտաքին գործերի նախարարությունը տեղյակ չէ, ուրեմն գոյություն չունի բանակցություն, որևէ ձևաչափով գոյություն չունի»,- այսօր ԱԺ-ում լրագրողների հետ զրույցում ասաց ԱԳ նախարար Արա Այվազյանը՝ պատասխանելով լրագրողի հարցին, ըստ որի՝ «Արման Աբովյանի հարցին ի պատասխան՝ Թուրքիայի հետ բանակցություններ գնում են, թե՞ ոչ, հայտարարեցիք, որ տեղյակ չեք, իսկ նոր նշեցիք, որ նման բանակցություններ չկան»:

Ճշգրտող հարցին, թե եթե բանակցություններ գոյություն չունեն, ապա ինչի՞ մասին է խոսում ԱԽ քարտուղարը, երբ ասում է՝ պետք է շտկումներ անել հարաբերություններում, Այվազյանը չմեկնաբանեց՝ հորդորելով այդ հարցն ուղղել ԱԽ քարտուղարին:

Հարցին՝ այն իշխանությունը, որի քաղաքականությունը հանգեցրեց պատերազմի, ունենք գերիներ, որոնց հարցը դեռ չի լուծվել, կարո՞ղ է շտկումներ անել, ԱԳ նախարարը պատասխանեց, որ իշխանության հասցեին հնչեցված գնահատականի հետ համաձայն չէ: Նա հավելեց, որ բոլոր խնդրահարույց հարցերի շուրջ այսօր խոսել է Արտաքին հարաբերությունների հանձանժողովի նիստին՝ ընդգծելով, որ, իհարկե, առաջնայինը գերիների հարցի շուտափույթ լուծումն է: