«Իմ քայլի» օգտին պատրաստ է քվեարկել հարցվածների 30-50%-ը. իմքայլական պատգամավորը՝ #РИАНовости-ին

ՀՀ վարչապետ Նիկոլ Փաշինյանը պատրաստ է հրաժարական տալ: Հրաժարականը կլինի ապրիլին և դրանով իսկ կսկսվի խորհրդարանական արտահերթ ընտրությունների քարոզարշավի մեկնարկը։ Գրում է РИА Новости-ն։

«Արտահերթ ընտրությունները բավարար չեն քաղաքական ճգնաժամը հաղթահարելու համար։ Սակայն ներկա պայմաններում դա ինչ-որ գործնական լուծում է։ Մարդկանց մշտապես փողոց դուրս բերելն ու բոյկոտելը, դժվար թե իրավիճակի կայունացման արժանի այլընտրանք լինի»,- РИА Новости-ի հետ զրույցում ասել է քաղաքագետ և «Իմ քայլը» խմբակցության պատգամավոր Միքայել Զոլյանը:

Նա կարծում է, որ Փաշինյանի կողմնակիցները լավ հնարավորություն ունեն խորհրդարանում վերընտրվելու համար։ «Դրա վկայությունը հարցումների արդյունքներն են։ «Իմ քայլի» օգտին պատրաստ է քվեարկել հարցվածների 30-50 տոկոսը։ Դա ավելի քիչ է, քան 2018-ի ընտրություններում, երբ մեր կուսակցությունն ստացավ 70 տոկոս։ Բայց աջակցության ներկայիս մակարդակը 10 անգամ գերազանցում է մեզնից հետո եկող քաղաքական ուժերի վարկանիշները»,- պարզաբանել է Զոլյանը։

«Մարդիկ հիմնականում հասկանում են, որ պատերազմում կրած պարտությունը միայն Փաշինյանի մեղքը չէ, այլ նախորդ իշխանությունների կառավարման արդյունքը։ Հենց նրանք են մարդկանց փողոց կանչում և փորձում նրանց մեծամասնություն ներկայացնել»,- կարծիք է հայտնել զրուցակիցը։

«Բարգավաճ Հայաստան» խմբակցության պատգամավոր Արման Աբովյանը համաձայն չէ, որ վարչապետի հակառակորդները ծրագիր չունեն: Նրա խոսքով՝ միացյալ ընդդիմության օրակարգի առանցքային կետը Փաշինյանի հրաժարականն է։

Երբ Փաշինյանը հեռանա, ընդդիմությունը ձեռնամուխ կլինի սոցիալ-տնտեսական և քաղաքական բարեփոխումների։

Բայց կսկսի Ռուսաստանի հետ հարաբերությունների խորացմամբ։ «Բարգավաճ Հայաստանը հանդես է գալիս Մոսկվայի հետ կապերի ընդլայնման, միջպետական նոր փաստաթղթի ստորագրման օգտին։ Պատերազմը ցույց տվեց, որ Ռուսաստանը շարունակում է մնալ Հայաստանի անվտանգության գլխավոր երաշխավորը Հարավային Կովկասում»,- նշել է Աբովյանը։

«Բարգավաճ Հայաստանը» դեմ է ընտրությունները բոյկոտելուն։ Կուսակցությունը մտադիր է մասնակցել ընտրարշավին որպես ինքնուրույն քաղաքական ուժ, թեև շարունակելու է կապը «Հայրենիքի փրկության շարժման» հետ, եզրափակում է լրատվամիջոցը: