Ջանլուկա Մարչիանոն և Մարիո Ստեֆանո Պիետրոդարկին Պիացոլայի «Ավե Մարիայի» կատարումը նվիրեցին Արցախի պատերազմի զոհերի հիշատակին

Հայաստանի պետական սիմֆոնիկ նվագախումբը հանդես եկավ Աստոր Պիացոլայի 100-ամյակին նվիրված համերգով‚ որի ընթացքում նվագախումբը և իտալացի բանդոնեոնահար‚ ակորդեոնահար Մարիո Ստեֆանո Պիետրոդարկին կատարեցին Պիացոլայի ստեղծագործությունները։

Մարիո Ստեֆանո Պիետրոդարկին‚ խոսելով Պիացոլայի արվեստի մասին‚ նշեց‚ որ այն չափազանց ինքնատիպ է ու գեղեցիկ‚ յուրաքանչյուր ոք սիրում է նրա հոգեպարար երաժշտությունը։ Արգենտինացի կոմպոզիտորի հնչյունները ներկայացնում են մեր կյանքի յուրաքանչյուր պահը՝ մեր տխրությունը‚ ուրախությունը‚ ուժը‚ թախիծը։

Անդրադառնալով Հայաստանի պետական սիմֆոնիկ նվագախմբի հետ համագործակցությանը՝ իտալացի երաժիշտն ընդգծեց. «Ես երկար տարիներ աշխատում եմ Հայաստանի պետական սիմֆոնիկ նվագախմբի հետ։ Իհարկե‚ շատ տարիներ առաջ‚ երբ առաջին անգամ հանդիպեցինք‚ և՜ ես‚ և՜ նվագախմբի երաժիշտները շատ ավելի երիտասարդ էինք‚ այսօր էլ նվագախմբի մոտ պահպանվել է նույն մոտիվացիան‚ լավագույնն արարելու ձգտումը։ Նվագախմբի երաժիշտները միշտ ցանկանում են բացահայտել նորը‚ ինչը շատ ողջունելի ու գնահատելի է»։

Համերգը ղեկավարում էին դիրիժորներ Սերգեյ Սմբատյանը և Ջանլուկա Մարչիանոն։ Արամ Խաչատրյան լեփ-լեցուն դահլիճը մեծ ջերմությամբ էր ընդունում երաժիշտների յուրաքանչյուր կատարում‚ որը լի էր հույզերով ու ոգեղենությամբ։

Երեկոյի ընթացքում Ջանլուկա Մարչիանոն և Մարիո Ստեֆանո Պիետրոդարկին Պիացոլայի «Ավե Մարիայի» կատարումը նվիրեցին Արցախի պատերազմի զոհերի հիշատակին։