Լուվրը թվայնացրել է իր ամբողջ հավաքածուն և հասանելի դարձրել

2780

Կիրակի, 04 ապրիլի, 2021 թ., 22:04

Լուվրի թանգարանը թվայնացրել է և առցանց հրապարակել իր ամբողջ հավաքածուն՝ 482 հազար արվեստի գործ։ Առցանց արխիվը մշտապես կթարմացվի և կավելացվի: Այս մասին գրում է CNN-ը։ Թանգարանը նախկինի պես փակ է այցելուների համար, սակայն այժմ Լուվրում ընթանում են վաղուց ծրագրված վերանորոգման աշխատանքները:
«Այսօր Լուվրը սրբել է իր գանձերի վրայի փոշին, նույնիսկ ամենից քիչ ճանաչվածների։ Առաջին անգամ յուրաքանչյուր ոք կարող է համակարգչի կամ սմարթֆոնի միջոցով անվճար հասանելիություն ստանալ ամբողջ հավաքածուին՝ անկախ նրանից, թե այդ արվեստի գործը ցուցադրվում է թանգարանում, ժամանակավոր օգտագործման համար է վերցվել, թե պահված է: Ես վստահ եմ, որ այս նախաձեռնությունն ավելի կոգեշնչի մարդկանց այցելել Լուվր և տեղում ծանոթանալ հավաքածուների հետ»,-հայտարարել է թանգարանի նախագահ Ժան Լյուկ Մարտինեսը:

Կայքում հասանելի են ոչ միայն Լուվրում ցուցադրված աշխատանքներն, այլև ժամանակավոր օգտագործման համար վերցված կամ պահվող արվեստի գործերը։
Բացի այդ, այցելել թանգարան՝ առանց տնից դուրս գալու, այժմ հնարավոր է ինտերակտիվ քարտեզի միջոցով: