«Ամենայն հավանականությամբ գաղտնի աշխատանքներ են տարվում`«խաղաղության պայմանագիր» ստորագրելու ուղղությամբ»․ Հ․ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է․ «Ամենայն հավանականությամբ գաղտնի աշխատանքներ են տարվում՝ «խաղաղության պայմանագիր» ստորագրելու ուղղությամբ։ Դրանով Հայաստանն ամրագրելու է սեփական պարտությունը, փաստացի հրաժարվելու սեփական տարածքները վերականգնելու հեռանկարից և նորանոր զիջումներ է անելու։
Դա լինելու է մեղմ և խաբուսիկ ձևակերպումներով, հայաստանցիների անգետ հատվածին հաճելի ու հուսատու տոներով, բայց այնուամենայնիվ՝ Հայաստանն առհավետ թաղող փաստաթուղթ։
Հանրային ոլորտում տարվող թաքնված կամ արդեն ոչ այդքան թաքնված արշավն ու ամենատարբեր պետական պաշտոնյաների հայտարարությունները Երևանում, Բաքվում և Մոսկվայում դրա մասին են վկայում։
Բացառված չէ, որ այդ պայմանագիրն այնուամենայնիվ չստորագրվի։ Բայց այս պահի դրությամբ՝ ամեն բան այդ ուղղությամբ է գնում։
Դավաճանների ռեժիմը հետևողականորեն իրականացնում է թուրք-ռուսաստանյան օրակարգը՝ ստեղծել նախ՝ տնտեսական, ապա և քաղաքական Մեծ Թուրան, երկաթուղով միացնել Ռուսաստանը Ադրբեջանին և Հայաստանի հանձմամբ Թուրքիային՝ ամրապնդել Ռուսաստան-Թուրքիա դաշինքը»։