«Ես դատախազության կայքի տեղը շատ լավ գիտեմ, պետք չէ ինձ հիշեցում անել»․ Թովմասյանը՝ Հովակիմյանին

Այսօր՝ ԱԺ արտահերթ նիստում՝ ՀՀ քրեական օրենսգրքում փոփոխություններ և լրացումներ կատարելու մասին հարցի քննարկման ժամանակ, անկախ պատգամավոր Թագուհի Թովմասյանը, դիմելով իմքայլական պատգամավոր Վահագն Հովակիմյանին, ասաց․ «Ուզում եմ իմանալ՝ արդյոք կա՞ քարոզարշավի խոչընդոտման, ընտրատեղամասերի առջև բռնության փորձերի և նմանատիպ դեպքերի թվային տվյալներ, և այս դրույթների ներառումն ու պատժի խստացումն ի՞նչ նպատակ է հետապնդում»։

Ի պատասխան՝ Վահագն Հովակիմյանն ասաց․ «Ուզում եմ հիշեցնել, որ բոլոր այդ վիճակագրությունները Գլխավոր դատախազության հաշվետվություններում միշտ կան։ Մեր խնդիրն է օրենսդրությունը բարելավել, որ բացասական երևույթները ընտրությունների ժամանակ չլինեն»։

Արձագանքելով իմքայլական պատգամավորին՝ Թագուհի Թովմասյանն ասաց․ «Ես դատախազության կայքի տեղը շատ լավ գիտեմ, պետք չէ ինձ հիշեցում անել»։

Հիշեցնենք, որ այսօր ԱԺ արտահերթ նիստում քննարկվում է ՀՀ քրեական օրենսգրքում փոփոխություններ և լրացումներ կատարելու մասին հարցը։

Քրեական օրենսգրքում փոփոխությամբ առաջարկվում է պատասխանատվություն նախատեսել բոլոր այն դեպքերի համար, երբ ընտրական գործընթացի խոչընդոտման արդյունքում տեղամասում քվեարկության արդյունքները անվավեր են ճանաչվում: Նախագծով առաջարկվում է նախընտրական քարոզչության խոչընդոտման, տեղամասային կենտրոնում կամ տեղամասի մուտքի մոտ բռնություն գործադրելու կամ դրա սպառնալիքի համար ևս նախատեսել քրեական պատասխանատվություն: