Ուրբաթ, 29 մարտի, 2024 թ.
|
Ստեփանակերտում`   +5 °C

Չինաստանում թույլատրել են 3 երեխա ունենալ

Չինաստանում թույլատրել են 3 երեխա ունենալ
1629
Երկուշաբթի, 31 մայիսի, 2021 թ., 20:10

Չինաստանի իշխանությունները որոշում են կայացրել թույլ տալ ընտանիքներին 3 երեխա ունենալ։ Այս մասին հայտնում է «Սինհուա» գործակալությունը։ Գործակալության տվյալներով՝ այդ որոշումն ընդունվել է Չինաստանի կոմունիստական կուսակցության Կենտրոնական կոմիտեի քաղբյուրոյի նիստի արդյունքներով: Նոր կանոնի ուժի մեջ մտնելու ամսաթիվը չի նշվում։
1970-ականների կեսերից ՉԺՀ-ում խիստ սահմանափակվել է ծնելիությունը։ Որոշ բացառություններով, ընտանիքներին թույլատրվել է միայն 1 երեխա ունենալ։ Այդ կանոնները խախտելու դեպքում ծնողների համար բարձր տուգանքներ են սահմանվել։ Նրանց նաև այլ լուրջ տույժերի են ենթարկել՝ ընդհուպ մինչև պետական ծառայությունից ազատելը, հարկադիր աբորտները և Չինաստանի Կոմունիստական կուսակցության շարքերից հեռացնելը:
Մի քանի տարի առաջ Չինաստանում թույլատրվում էր 2-րդ երեխան ունենալ այն ընտանիքներին, որտեղ 2 ծնողներն էլ միակ երեխաներն են, ինչպես նաև գյուղերում բնակվող զույգերին, եթե նրանց 1-ին երեխան աղջիկ է: 2013 թվականին չինացի օրենսդիրները թույլ են տվել 2 երեխա ունենալ այն դեպքում, երբ ամուսիններից առնվազն 1-ը ծնողների միակ զավակն է: 2016 թվականի հունվարի 1-ին ՉԺՀ-ում ուժի մեջ է մտել օրենք, որը թույլ է տալիս բոլոր ընտանիքներին 2 երեխա ունենալ: