«Ախթամար» քառյակը և «Կադանս» անսամբլը կներկայանան «Երաժշտություն՝ Հայաստանին» խորագրով համերգով

Հունիսի 10-ին՝ ժամը 19:00-ին Կոմիտասի անվան կամերային երաժշտության տանը կանցկացվի «Երաժշտություն՝ Հայաստանին» խորագրով համերգային երեկոն: Երեկոյի ընթացքում ելույթ կունենան «Ախթամար» քառյակը (Բելգիա / Ֆրանսիա) և «Կադանս» անսամբլը:

Համերգային ծրագրում՝ Կլոդ Դեբյուսի, Կոմիտաս/Ասլամազյան, Յոհաննես Բրամս, Էժենի Ալեսյան, Սայաթ-Նովա, Աստոր Պիացոլա, Վալտեր Ռիոս, Ռիչարդ Գալիանո:

Նշենք, որ արտասահմանում մեծ ժողովրդականություն վայելող «Ախթամար» քառյակի առաջին ջութակը հայազգի Կոլին Ալեսյանն է: Քառյակի կազմում հանդես են գալիս Ջենիֆեր Պիոն (2-րդ ջութակ), Օնդին Սթասիկը (ալտ) և Սիրիլ Սիմոնը (թավջութակ):

2020թ․ Cypres Records բելգիական ընկերությունը թողարկեց քառյակի «Հայկական առասպելներ» անվանումով առաջին ձայներիզը, որտեղ ներկայացված են Կոմիտասի «Մանրապատումները» և Է․ Ալեսյանի «Հայկական քառյակը»՝ նվիրված «Ախթամարին»։ Ձայներիզը արժանացել է բրիտանական BBC երաժշտական ամսագրի 4 աստղ բարձր գնահատականին և բելգիական Octaves de la Musique հանդեսի 2021թ․ մրցանակին։ «Ախթամարը» ProQuartet կազմակերպության և ECMA միջազգային ասոցիացիայի անդամ է։