«Լուրեր են շրջանառվում, որ հենց դարձաք վարչապետ, Սյունիք եք վերադարձնելու Սուրիկ Խաչատրյանին»․ գորիսեցին՝ Քոչարյանին

Այսօր՝ Սյունիքում «Հայաստան» դաշինքի նախընտրական քարոզարշավի ժամանակ, ՀՀ երկրորդ նախագահ Ռոբերտ Քոչարյանին քաղաքացիների կողմից հարց բարձրացվեց.

«Գորիսում լուրեր են շրջանառվում, որ հենց դարձաք ՀՀ վարչապետ, Սյունիք եք վերադարձնելու Սուրիկ Խաչատրյանին և նրան նորից մարզպետ եք նշանակելու»:

«Առաջին հերթին, դուք հումորի լավ զգացում ունեք»,- պատասխանեց Քոչարյանը։ «Ես, համենայնդեպս, կարող եմ ասել, որ մեր ցուցակում այդպիսի անձնավորություն չկա։ Մեր դաշինքը բաղկացած է երկու կուսակցություններից և անկուսակցական իմ թիմակիցներից։ Այդ միավորներից մեկը «Վերածնվող Հայաստան» կուսակցությունն է, և մի՞թե դուք մտածում եք, որ այդ կուսակցությունը չունի բավարար կադրային պոտենցիալ՝ առաջարկելու ձեզ՝ մարդու, որ լինի այստեղ մարզպետ և պատասխանատվություն կրի այս տարածքի զարգացման համար։ Այդպես է լինելու»,- նշեց Քոչարյանը:

Հիշեցնենք՝ «Վերածնվող Հայաստան» կուսակցությունը գլխավորում է Սյունիքի նախկին մարզպետ Վահե Հակոբյանը: