«ԱՄՆ, ՌԴ և Ֆրանսիայի դեսպանները չեն ընդունել Շուշի այցելելու Ալիևի հրավերը». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «ԱՄՆ, ՌԴ և Ֆրանսիայի դեսպանները, և էլի մի քանի երկրի դեսպան, չեն ընդունել Շուշի այցելելու Ալիևի հրավերը: Անկասկած է, որ նրանցից յուրաքանչյուրն ունի իր քաղաքական մոտիվը: ԱՄՆ, ՌԴ և Ֆրանսիայի դեպքում դա անշուշտ Մինսկի խմբի համանախագահությունն է, և սա հատկանշական հանգամանք է: Այսինքն՝ համանախագահ երկրներն առաջնորդվում են հետևյալ տրամաբանությամբ՝ ոչինչ որոշված չէ, քանի դեռ որոշված չէ ամեն ինչ:

Սա դեռ չի նշանակում, որ նրանք դե ֆակտո չեն ճանաչում պատերազմի հետևանքը: Չխաբենք ինքներս մեզ:

Լայնամասշտաբ պատերազմն ավարտվել է, բայց չի ավարտվել այն մեծ գործընթացը, որի բաղադրիչ և գործիքներից մեկը եղել է հենց պատերազմը: Այդ գործընթացը շարունակվում է և կշարունակվի դեռ երկար:

Եվ այստեղ, ի դեպ, հարցերից մեկն էլ այն է, թե արդյո՞ք այդ երկար ընթացքում դարձյալ կառաջանա պատերազմ-գործիքի անհրաժեշտություն, ե՞րբ, ինչպե՞ս: Բայց, չշեղվենք:

Շուշի չայցելելը դեռ չի նշանակում, որ չեն ընդունում քաղաքի ադրբեջանական վերահսկողության տակ անցնելը:

Հետևաբար չընկնենք պատրանքների գիրկը և տեղիք տանք նաև մեդիամանիպուլյացիաների: Շուշի չայցելելն ընդամենը նշանակում է, որ համանախագահներից յուրաքանչյուրը դեռ չի ստացել այն քաղաքական գինը, որ արժե այցը: Չի ստացել Ալիևի՞ց, թե՞ Էրդողանից, սա էլ թերևս հարց է»: