Կամերային նվագախումբը համերգներով հանդես է գալիս Արաբական Միացյալ Էմիրություններում

Հայաստանի պետական կամերային նվագախումբը ընդլայնված կազմով 5 համերգներով հանդես կգա Արաբական Միացյալ Էմիրություններում: Օգոստոսի 10-ին և 11-ին համերգները կանցկացվեն Դուբայի շքեղ օպերային դահլիճում: Երաժիշտներն արդեն իսկ ժամանել են Դուբայ, և նվագախումբն այսօր անց է կացնում առաջին փորձը:

Նշենք, որ համերգների դիրիժորներն են էրնսթ Վան Թիելը և Սթիվ Սիդվելը։ Համերգային ծրագրում հայտնի Joker ֆիլմի կինոերաժշտությունն է, ինչպես նաև ABBA, DISCO և West End սիմֆոնիկ շոու ծրագրերը:

Ի դեպ, Դուբայի օպերան բացվել է 2016 թվականին՝ դառնալով երկրի կարևոր խորհրդանիշներից մեկը: Առաջին համերգին հանդես է եկել Պլասիդո Դոմինգոն, այնուհետև օպերան հյուրընկալել է բազում աշխարհահռչակ մենակատարների ու երաժշտախմբերի: Այս բեմում հանդես է եկել նաև լեգենդար տենոր Խոսե Կարերասը: Կամերային նվագախմբի համար նշանակալի է հանդես գալ այս սրահում: Հավելենք, որ Հայաստանում նվագախմբի հաջորդ համերգը կկայանա սեպտեմբերի 9-ին: