Արխիվային բացառիկ փաստաթուղթ՝ Հովհաննես Քաջազնունուն բնակարան հատկացնելու վերաբերյալ

Պատմաբան Ռուբեն Շուխյանը սոցկայքի իր էջում գրել է. «Հովհաննես Քաջազնունու բնակարանը՝ Երևանում
Ներկայացնենք բացառիկ արխիվային փաստաթուղթ՝ Հովհաննես Քաջազնունուն բնակարան հատկացնելու վերաբերյալ Երևանի քաղաքային գործադիր կոմիտեի կողմից 1925 թվականի մարտի 7-ին տրված տեղեկանքը: Փաստաթուղթը պահվում է Երևանի պատմության թանգարանում:
Տեղեկանքում հստակ նշված է շենքի հասցեն. Երևանում Քաջազնունուն տրամադրվում էր 2 սենյականոց բնակարան՝ 1-ին Գնունի փողոցում, թիվ 2 տանը, իսկ դա՝ ներկայիս Պուշկինի փողոցի թիվ 4/1 շենքն է:

Այս տարվա հունիսին կայացած Կառավարության նիստում վերջապես որոշվեց գերակա հանրային շահ ճանաչված տարածքների ցանկից հանել Երևանի Պուշկինի 4/1 և 4/2-ից մինչև Պուշկինի 10 հասցեների՝ 19-րդ դարավերջի շենքերը, այսինքն՝ նրանք այլևս չեն քանդվելու: Այնպես որ՝ Պուշկինի 4/1 շենքի վերանորոգումից հետո այստեղ Քաջազնունու տուն-թանգարանի տեղակայումն այժմ միանշանակ և՛ հնարավոր է, և՛ պարտադիր:
Ականավոր քաղաքական և պետական գործիչ, Հայաստանի Առաջին Հանրապետության առաջին վարչապետ, տաղանդաշատ ճարտարապետ, պրոֆեսոր Հովհաննես Քաջազնունին Խորհրդային Հայաստան էր վերադարձել 1924-ին, նպատակ ունենալով օգնել հայրենիքին և զբաղվել զուտ իր մասնագիտությամբ՝ ճարտարապետությամբ: Քաջազնունին մահացավ 1938 թվականի հունվարի 15-ին, Երևանի բանտային հիվանդանոցում թոքաբորբից՝ 70 տարին դեռ չբոլորած: Ստալինյան բռնապետական ռեժիմի կողմից նա շինծու գործով ձեռբակալվել էր և պետք է գնդակահարվեր դեռևս 1937-ի դեկտեմբերի 5-ին՝ Չեկայի եռյակի կայացված որոշման համաձայն, և այդ վճիռը ժամանակավորապես կարողացել էր կանխել բանտային բժիշկը»։