«ՌԴ խաղաղապահների դեմ Ադրբեջանում հուժկու հակաքարոզչություն է գեներացվում». Նիկոլ Փաշինյան

«Համոզված եմ, որ Ադրբեջանի հետ անհրաժեշտ է օր առաջ սկսել սահմանազատման ու սահմանագծման աշխատանքները ու ցավում եմ, որ ներքաղաքական աղմուկի պատճառով գարնանը հնարավոր չեղավ հասնել նախանշված լուծումներին: Այսօր հայ-ադրբեջանական սահմանային տարբեր հատվածներում անկայուն իրավիճակը լրջագույն խոչընդոտ է այդ աշխատանքների համար ու կարծում եմ՝ տրամաբանական է, մասնավորապես, Սոթք-Խոզնավար հատվածում ստորաբաժանումների հայելային հետ քաշումը»,- Ազգային ժողովում հայտարարեց ՀՀ վարչապետ Նիկոլ Փաշինյանը՝ կրկին անդրադառնալով ռուս սահմանապահների տեղակայման, ՀԱՊԿ դիտորդների գործուղման, ԵԱՀԿ դիտորդության իրականացման տարբերակներին:

Խոսելով ԼՂ-ում ռուս խաղաղապահների առաքելության մասին՝ վարչապետն ասաց. «Մտահոգություն է առաջացնում այն փաստը, որ ՌԴ խաղաղապահների դեմ Ադրբեջանում հուժկու հակաքարոզչություն է գեներացվում ու գործողություններ են արվում: Կարծում եմ՝ ադրբեջանական դատարանների կողմից մեր գերեվարված քաղաքացիներին երկար ազատազրկման դատապարտելու փաստը նաև ՌԴ խաղաղապահ ուժերին վարկաբեկելու նպատակ ունի»: