«ԿԳՄՍՆ-ն տեղյակ է եղել, խախտում չենք արձանագրել»․ Արա Թարվերդյանի պարզաբանումը

«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Արա Թարվերդյանի պարզաբանումը սեպտեմբերի 4-ին ՊՈԱԿ-ի մասնաճյուղ «Գառնի» պատմամշակութային արգելոց-թանգարանի տարածքում անցկացված հարսանեկան միջոցառման վերաբերյալ։
Կազմակերպության ղեկավարը հանգամանալից անդրադարձել է վերջին օրերին մամուլում և սոցիալական այլ հարթակներում շրջանառվող տարաբնույթ տեղեկատվությանը։
Արա Թարվեդյանին զարմացրել է ԿԳՄՍՆ հայտարարությունը, թե տեղյակ չեն եղել։ Ըստ նրա՝ իրենք դիմել են և՛ բանավոր, և՛ գրավոր և ստացել են պատասխան։ Նա ներկայացրել է փաստաթղթեր և անընդունելի համարել իրենց հասցեագրված մեղադրանքները, թե կոպիտ խախտումներ են եղել։ Բացի այդ, 92 տուրիստական կազմակերպություններ, մարզպետարանները տեղյակ են եղել գրավոր։ Ըստ նրա՝ աղմուկն ուղղորդված է:
Արա Թարվեդյանը պնդեց, որ ինքը քավորը չէր և չէր կարող Երևանում նստած քավորություն անել, ամուսնացողները պարսկահայեր են։
Նա նաև հայտարարեց, որ հուլիսի 14-ին ինքն արդեն հրաժարականի դիմում է ներկայացրել, և այն բնավ կապ չունի Գառնիում տեղի ունեցած հարսանիքի հետ։