«ՀԱՊԿ-ը օգնություն կտրամադրի Տաջիկստանին՝ Աֆղանստանի հետ սահմանին իրավիճակի սրման դեպքում». Զաս

Հավաքական անվտանգության պայմանագրի կազմակերպության անդամ-երկրները միակարծիք են և օգնություն կտրամադրեն Տաջիկստանին՝ Աֆղանստանի հետ սահմանին իրավիճակի սրման դեպքում: Այս մասին լրագրողներին հայտնել է ՀԱՊԿ գլխավոր քարտուղար Ստանիսլավ Զասը՝ անդրադառնալով այսօր տեղի ունեցած ՀԱՊԿ արտաքին գործերի նախարարների խորհրդի, պաշտպանության նախարարների խորհրդի և անվտանգության խորհուրդների քարտուղարների կոմիտեի համատեղ նիստի արդյունքներին: Նա ընդգծել է, որ Աֆղանստանում տիրող իրավիճակը մտահոգում է ՀԱՊԿ-ին: «ՀԱՊԿ անդամ բոլոր երկրները միակարծիք են և ևս մեկ անգամ հաստատել են իրենց ընդհանուր դիրքորոշումը: ՀԱՊԿ հարավային սահմաններին իրավիճակի սրման պարագայում՝ Տաջիկստանին ռազմական և դիվանագիտական օգնություն կցուցաբերվի»,- ասել է Զասը: