Ժապարովը կոչ է արել գործողությունների մեխանիզմ մշակել ՀԱՊԿ երկրներից մեկի՝ մյուսի դեմ զինված ագրեսիայի դեպքում

Այսօր տեղի է ունեցել Հավաքական անվտանգության խորհրդի ընդլայնված նիստը, որին մասնակցում էր նաև ՀՀ վարչապետը: Հայաստանը ստանձնել է Հավաքական անվտանգության պայմանագրի կազմակերպության նախագահությունը։ Տաջիկստանի նախագահ Էմոմալի Ռահմոնը ՀԱՊԿ-ի նախագահությունը ստանձնելու կապակցությամբ իր և իր երկրի անունից շնորհավորել է Նիկոլ Փաշինյանին։

Ղրղզստանի նախագահ Սադիր Ժապարովն իր հերթին առաջարկել է Հավաքական անվտանգության պայմանագրի կազմակերպության շրջանակներում մշակել գործողությունների մեխանիզմ՝ անդամ երկրներից մեկի՝ մյուսի վրա հարձակման դեպքում: «Հաշվի առնելով տարածաշրջանում տիրող իրավիճակը՝ նախագահը հնչեցրել է մի շարք առաջարկներ, այդ թվում ՝ կազմակերպության ներսում արագ արձագանքման և որոշումների կայացման մեխանիզմների մշակման հարցը՝ ՀԱՊԿ անդամ երկրներից մեկի՝ մյուսի դեմ զինված ագրեսիայի դեպքում»,- ասվում է Ղրղզստանի նախագահականի տարածած հաղորդագրության մեջ: