Դամասկոսը պահանջել է անհապաղ դուրս բերել թուրքական զորքերը Սիրիայից

Սիրիայի իշխանությունները պահանջում են, որ Թուրքիան անհապաղ դուրս բերի իր զորքերը երկրի հյուսիսային շրջաններից: Այս մասին «Ռիա Նովոստի»-ին հայտնել է Սիրիայի ԱԳ նախարար Ֆեյսալ Միկդադը: Այս կերպ նա արձագանքել է Իդլիբ նահանգում տեղի ունեցած լարվածության սրմանը: «Ես կարծում եմ, որ Թուրքիան պետք է անհապաղ դուրս բերի իր զորքերը: Միջազգային հանրությունն, իր հերթին, պետք է աջակցի երկրի հյուսիսում օկուպացված տարածքների ազատագրմանն ուղղված Սիրիայի ջանքերին»,- նշել է Միկդադը: Սիրիայի ԱԳՆ-ի կարծիքով՝ լարվածության պատճառը թուրքական օկուպացիան է և այն աջակցությունը, որն Անկարան ցուցաբերում է ահաբեկչական խմբավորումներին: Bloomberg-ը՝ հղում կատարելով թուրք բարձրաստիճան պաշտոնյաներին, նշում է, որ Թուրքիան լրացուցիչ զորքեր է տեղափոխել Սիրիա՝ Պուտինի հետ նախատեսվող հանդիպմանն ընդառաջ: