«Սիրո գույնը պակասեց քաղաքից». վերջին հրաժեշտը՝ Հայկոյին

Ալ. Սպենդիարյանի անվան օպերայի և բալետի ազգային ակադեմիական թատրոնում հարազատները, ընկերները, երկրպագուները վերջին հրաժեշտն են տալիս ՀՀ վաստակավոր արտիստ, երգիչ, երգահան Հայկոյին (Հայկ Հակոբյան):

Հայաստանի վաստակավոր արտիստ Արամոն լրագրողների հետ զրունցում հիշեց իր և Հայկոյի ծանոթությունը՝ 1996-ին: «Ինքնատիպ էր, սկզբունքային... մնաց այն երաժիշտը, ով մինչև վերջ էդ սանդղակը պահեց, այսինքն՝ վերցրեց ռոմանսների ճանապարհը ու գնաց, պլանկայից չիջավ»:

«Հայոց ծիածանը կորցրեցինք: Հայկոն մեր ժամանակակից մշակույթի աշուղն էր, ով միջազգային բեմ բարձրացրեց հայոց սիրային արվեստը ու երբ բեմ էր բարձրանում, էդտեղ կար հայոց ներկայությունը»,- ասաց քաղաքական գործիչ Րաֆֆի Հովհաննիսյանը՝ նշելով, որ Հայկոն հայրենասեր էր իսկական հայ:

«Հայկոյի հետ անձնական շփում շատ եմ ունեցել: ՀՀ յուրաքանչյուր քաղաքացի վայելել է նրա երգերը: Հայկոն միշտ կմնա մեր հուշերում որպես լավ մարդ»,- ասաց բռնցքամարտիկ Արթուր Աբրահամը՝ հավելելով, որ վերջին անգամ ամիսներ առաջ՝ միջոցառման ժամանակ է հանդիպել ընկերոջը:

«Սիրո կարևոր գույն պակասեց քաղաքից, իսկ ամենակարևորը՝ շատ լավ մարդ, որ մեր ասպարեզում հազվադեպ է»,- նշեց դերասանուհի Անահիտ Կիրակոսյանը: