Մեծ էկրան բարձրացավ «Մեր բակը 25 տարի անց» ֆիլմը

1068

Ուրբաթ, 05 նոյեմբերի, 2021 թ., 14:18

Նոյեմբերի 4-ին «Մոսկվա» կինոթատրոնում կայացավ «Մեր բակը 25 տարի անց» ֆիլմի պրեմիերան։

Ֆիլմը հին ու նոր կերպարներով նախորդ երեք մասերի տրամաբանական շարունակությունն է, որտեղ կրկին հերոսները միահամուռ ուժերով ցանկանում են ինչ-որ բանի հասնել։
Ֆիլմում նույն բակն է, հայտնի դալանը, ֆիլմաշարի նախորդ մասերից սիրված արտահայտություններն ու պատկերները։
«Մեր բակը» «Շարմ» հոլդինգի և Հանրային հեռուստաընկերության համատեղ նախագիծն է։ Ֆիլմի պրոդյուսեր Տիգրան Վիրաբյանի խոսքով՝ Հանրային հեռուստաընկերությունը պետք է կինոարտադրության ոլորտում իր ծավալները մեծացնի։
«Կարծում եմ, որ «Մեր բակը» իր ժանրում անկախության տարիների ամենակայացած ֆիլմերից է, որը սպասված է բոլոր ընտանիքներում»,- նշեց նա։
Ֆիլմի ռեժիսոր Արշալույս Հարությունյանի խոսքով՝ թվում էր, թե ամենապատասխանատու պահն այն էր, երբ ստացավ ֆիլմը նկարահանելու առաջարկ, մինչդեռ պատասխանատու պահը հիմա է, երբ հազարավոր մարդիկ պետք է դիտեն իր աշխատանքը։

«Անցել են ընդամենը տարիներ, բայց չեն փոխվել մեր վերաբերմունքն ու տեսակը»,- ասաց ֆիլմի գլխավոր դերակատարներից Լալա Մնացականյանը։

«Ես, Հրանտը, Լալան միշտ էլ ընկերներ ենք եղել, էս ֆիլմից հետո մի տեսակ դարձանք հարազատներ»,- ասաց ֆիլմի գլխավոր դերակատարներից Աշոտ Ղազարյանը՝ նշելով, որ իրենք էլ էին կարոտել ֆիլմը։