ՌԴ ԱԳՆ-ն հայտարարություն է տարածել

Ռուսաստանի, Հայաստանի և Ադրբեջանի ղեկավարների ստորագրած հայտարարության 1-ամյակի կապակցությամբ ՌԴ ԱԳՆ-ն հայտարարություն է տարածել.

«Այդ քայլը թույլ տվեց վերջ դնել արյունահեղությանը և սկսել տարածաշրջանում խաղաղ կյանքի հաստատման գործընթացը: Կարող ենք արձանագրել, որ նոյեմբերի 9-ի հայտարարությամբ ամրագրվածն ընդհանուր առմամբ իրականացվում է:

Ռուսական խաղաղապահների մասնակցությամբ 2020թ. դեկտեմբերի 2-ից վերադարձվել է ընդհանուր առմամբ 122 ռազմագերի և պահվող անձ։ Նրանցից Հայաստանին վերադարձվել է 105-ը, Ադրբեջանին՝ 17-ը: Ադրբեջանական կողմին տրվել է ականապատ դաշտերի քարտեզների 3 փաթեթ»:

Հայտարարության մեջ նշվում է նաև տրամադրված հումանիտար օգնության, իրենց տներ վերադարձած անձանց մասին: Նշվում է, որ շարունակվում են ջանքերը՝ բոլոր պահվող անձանց ազատ արձակման ուղղությամբ:

«Կարևորում ենք հայ-ադրբեջանական սահմանին լարվածության թուլացումը և սահմանագծման ու սահմանազատման գործընթացի մեկնարկը՝ հնարավորինս շուտ։ Պատրաստ ենք աջակցել անհրաժեշտ խորհրդատվությամբ»,- մասնավորապես ասված է տեքստում: