«Չցանկանալով հասկանալ աշխարհի կարգը, չենք կարող այդ նույն աշխարհում առաջ գնալ». Տարոն Սիմոնյան

Իրավաբան, ԱԺ նախկին պատգամավոր Տարոն Սիմոնյանի գրառումը․ «Մենք այդպես էլ չհասկացանք աշխարհի կարգը, իսկ ավելի ճիշտ՝ չցանկացանք հասկանալ...
Որովհետև, երբ աշխարհում խոսում էին ուժով ու հատկապես ազգային ուժով, մենք խոսում էինք մարդկության աղերսներով ու ազգային լացով՝ հույսներս դնելով ուժով խոսացողների խղճին, որը մեր խիղճը չէր։ Դրա համար մեր շերեփը թղթից էր։
Երբ աշխարհում խոսում էին իրավունքի ուժով, և մենք իրավունքի ուժով ու ուժի իրավունքով ազատագրեցինք Արցախը, մոռացանք խոսել այդ նույն իրավունքի ուժով, ամրագրել մեր ազատագրածը ու հույսներս դրեցինք ինչ֊որ քաղաքականության ուժին, որի աղբյուրը մենք չէինք։
Ու հիմա, երբ աշխարհում խոսում են նորից ուժով, հատկապես՝ ազգային ուժով, մենք նորից հույսներս դնում ենք լացի ձայնի բարձրությանը, ուժով խոսացողների խղճին ու ինչ֊որ քաղաքականության ուժին, որի աղբյուրը էլի մենք չենք։
Այսպես, չհասկանալով կամ չցանկանալով հասկանալ աշխարհի կարգը, չենք կարող այդ նույն աշխարհում առաջ գնալ։ Հա, կգոյատևենք առանձին նվիրյալների և անձնազոհ մարդ-հայրենիքների շնորհիվ, բայց այդպես էլ հենց կյանքը մեզ չի հասկանա ...
Նայում ենք մեր շուրջը՝ ինչքան ազգային ներուժ կա, որ չի ներդրվում ազգային երազանք կերտելու գործին, ու հակառակը՝ ինչքան մեծ ջանասիրությամբ է ծափահարվում կա՛մ բարձր գոռացողների, կա՛մ տգետ վախկոտների մանրությունը, հասկանում ենք, որ սկզբից պետք է սկսենք՝ հայ անհատ և հայ հանրություն կերտելուց, որովհետև պիտի սովորենք հասկանալ մեզ ու աշխարհի կարգը»: