Բայդեն-Պուտին հեռախոսազրույցի ժամանակ նախագահները հանդես են եկել նախազգուշացումներով. «Ամերիկայի ձայն»

901

Ուրբաթ, 31 դեկտեմբերի, 2021 թ., 10:30

«Ամերիկայի ձայն»-ն անդրադարձել է Բայդեն-Պուտին հեռախոսազրույցին:

«Ռուսաստանի նախագահ Վլադիմիր Պուտինը նախազգուշացրել է իր ամերիկացի գործընկեր Ջո Բայդենին, որ Ռուսաստանի դեմ նոր պատժամիջոցների սահմանումը կարող է հանգեցնել հարաբերությունների ամբողջական խզման։

Ըստ Ռոյթերս լրատվական գործակալության հաղորդած տեղեկությունների, հինգշաբթի ուշ երեկոյան հեռախոսազրույցում Ռուսաստանի նախագահն ասել է, որ նման պատժամիջոցները «մեծ սխալ» կլինեն։

Ի պատասխան Պուտինի նախազգուշացումներին, ԱՄՆ նախագահ Ջո Բայդենն էլ ասել է, թե ԱՄՆ-ը և նրա դաշնակիցները վճռականորեն կպատասխանեն Ուկրաինա ցանկացած ներխուժման:

Հիշեցնենք, որ հեռախոսազրույցը տեղի է ունեցել Պուտինի խնդրանքով: Հեռախոսազրույցի նպատակը Ուկրաինայի արևելյան սահմանի շուրջ լարվածությունը թուլացնելու վերջին փորձն է, քանի որ այստեղ են կուտակվել ռուսական բանակի ավելի քան 100,000 թվակազմով ուժեր:

Զորքերի տեղակայումն անհանգստություն է առաջ բերել Արևմուտքում, և ԱՄՆ-ը սպառնում է Պուտինին աննախադեպ պատժամիջոցներով:

Ռուսաստանը հայտարարում է, թե չի պատրաստվում ներխուժել այդ երկիր, և որ զորքերն այնտեղ են զորավարժությունների համար:

ԱՄՆ-ի բարձրաստիճան պաշտոնատար անձինք տեղեկացնում են, որ երկու նախագահների միջև զրույցի հնչերանգները եղել են «լուրջ և առարկայական»:

«Նախագահ Բայդենը կրկնել է, որ այս երկխոսություններում բովանդակային առաջընթաց կարող է լինել միայն դեէսկալացիայի պայմաններում»,- ասել է Սպիտակ տան մամուլի քարտուղար Ջեն Փսաքին։

«Բայդենը հասկացրել է, որ Միացյալ Նահանգները և նրա դաշնակիցներն ու գործընկերները վճռականորեն կպատասխանեն, եթե Ռուսաստանը որևէ ժամանակ ներխուժում իրականացնի դեպի Ուկրաինա»,- հավելել է Փսաքին:

ԱՄՆ-ի և Ռուսաստանի պաշտոնյաները պատրաստվում են հանդիպել հաջորդ ամիս Ժնևում, և Սպիտակ տունը հայտնել է, որ Բայդենը կոչ է արել իր ռուս գործընկերոջը հետամուտ լինել դիվանագիտական լուծմանը»: