«Նիկոլ Փաշինյանին թվում է, որ եթե ինքը լուրջ ընդունի ՀԱՊԿ-ին, ՀԱՊԿ-ն էլ լուրջ կընդունի իրեն»․ Դանիել Իոաննիսյան

ԻՔՄ համակարգող, Հանրային խորհրդի անդամ Դանիել Իոաննիսյանը ֆեյսբուքյան իր էջում գրել է. «Վարչապետ Նիկոլ Փաշինյանին թվում է, որ եթե ինքը լուրջ ընդունի ՀԱՊԿ-ին, ապա ՀԱՊԿ-ն էլ լուրջ կընդունի իրեն ու մեզ (Հայաստանին)։
Էտ մարդը հավատում է, որ պետք է Վլադիմիր Պուտինի հետ առավելագույնս ազնիվ լինի, որ Մոսկվան դադարի մեզ «գցել»։
Նման մոտեցում երբեմն ունենում են բռնված միամիտ հանցագործները, որոնք սկսում են հրաժարվել փաստաբանից ու ամեն ինչ պատմել օպերներին ու քննիչներին՝ հույս ունենալով, որ դատարանը դա հաշվի կառնի։ Իսկ վերջում իրենք հա՛մ կալանավորվում ու դատվում են, հա՛մ էլ իրենց պատմածներն իրենց դեմ է օգտագործվում։
Դառնալով մեզ՝ ասեմ, որ տպավորություն է ստեղծվում, որ Վլադիմիր Պուտինը Նիկոլ Փաշինյանին համոզել է, որ մեր բոլոր ողբերգությունները նրանից են, որ Սերժ Սարգսյանը ազնիվ չէր իր (Պուտինի) հետ»։