Միրզոյանը մանրամասնեց՝ ինչու է Բելառուսի դեսպանը կանչվել ՀՀ ԱԳՆ

ՀՀ արտաքին գործերի նախարար Արարատ Միրզոյանն Ազգային ժողովում հաստատեց այն տեղեկությունները, որ ՀՀ–ում Բելառուսի դեսպան Ալեքսանդր Կոնյուկը կանչվել է ՀՀ արտաքին քաղաքական գերատեսչություն։
«Ալեքսանդր Գրիգորևիչի (Լուկաշենկոյի–խմբ) հայտարարություններն առաջին անգամ չէ, որ արժանանում են միջազգային գործընկերների ուշադրությանը։ Մեր խորին համոզմամբ՝ այս ձևակերպումներն ուղղված էին սպասարկելու Բելառուսի նախագահի ներքին քաղաքական օրակարգը:
Դեսպանին մեզ մոտ կանչելուց հետո նրան փոխանցվել են հայկական կողմի այն համոզմունքները, որ միմյանց մասին երկկողմ հայտարարությունները պետք է հիմնված լինեն փոխադարձ հարգանքի վրա: Նման հայտարարություններ անելիս պետք է հաշվի առնվեն միմյանց շահերը, սուվերենությունը, ինչպես նաև իրավապայմանագրային և մյուս դաշտը, որոնց հիման վրա երկու երկրները համագործակցում են»,– ասաց ՀՀ ԱԳ նախարարը։
Միրզոյանը շեշտեց, որ, այնուամենայնիվ, համապատասխան պաշտոնական հայտագրերի դեպքում պատրաստ են տարբեր միջազգային հարթակներում շարունակել հնարավորինս աջակցել Բելառուսին։