«Երեկ ընդդիմության համար չափազանց տխուր օր էր». Սուրեն Սուրենյանց

Քաղաքագետ Սուրեն Սուրենյանցի գրառումը․ «Իհարկե, հասկանալի պատճառներով՝ Նիկոլ Փաշինյանի հրապարակային խոսքը կորցրել է իր արժեքը, ու դրա պատճառն այն է, որ գործող վարչապետը հանդես է գալիս հակասական հայտարարություններով։

Մյուս կողմից, Նիդերլանդներում Փաշինյանը ԼՂ խնդրում, հայ-ադրբեջանական դիալոգի վերաբերյալ հանդես է եկել մի քանի հայտարարություններով։ Դրանք կարող էին գոնե մասամբ ցրել այն մտավախությունները, որոնք ընդդիմադիր վերջին գործընթացի առիթ են հանդիսացել։

Ասածս այն է, որ ընդդիմությունն արմատական դիրքերից նահանջելու ու իշխանության հետ խորհրդարանական ու այլ ֆորմատներով բանակցելու, երկխոսելու ազդակ ստացել է, եթե, իհարկե, ակցիաների բուն նպատակը Հայաստանի անվտանգությունն ու Արցախն են։

Եթե խորհրդարանական ընդդիմությունը գնա դիալոգի ճանապարհով, ապա ոչ միայն կարող է քաղաքականապես մոտիվացված համարել վերջին օրերի իր գործողությունները, այլ նաև պնդել, որ իր գործողություններով նպաստել է արտաքին քաղաքական ռիսկերի չեզոքացմանը։

Եթե շեշտը դրվի անտագոնիստական տրամադրությունների գեներացիայի ու Երևանի քաղաքապետարանի «պաշարման» տիպի արկածախնդիր գործողությունների վրա, ապա շարժումն օրերի ընթացքում մարգինալացվելու է՝ դրանից բխող հետևանքներով։

Երեկ ընդդիմության համար չափազանց տխուր օր էր, հետևություններ անել է պետք»։