Մոլդովան հրաժարվել է Բելառուսին արտահանձնել ուկրաինացի պատգամավորին

Մոլդովայի գլխավոր դատախազությունը հրաժարվել է Բելառուսին հանձնել Գերագույն Ռադայի պատգամավոր Եվգենի Յակովենկոյին, ով ձերբակալվել էր հունիսի 5-ին Մոլդովայի սահմանին։ Այս մասին հայտնում է NewsMaker-ը։

«Արտահանձնումից հրաժարվելու պատճառները պայմանավորված են այդ անձի՝ որպես Ուկրաինայի Գերագույն Ռադայի անդամի կարգավիճակով, ով 2019 թվականին Դոնեցկի մարզում հաղթել է ընտրություններում»,- նշել է դատախազությունը:

Մոլդովայի դատախազությունը կասկածում է, որ եթե Յակովենկոյին արտահանձնեն Բելառուս, ապա նրա նկատմամբ դատավարությունը արդար չի լինի։ Բացի այդ, Մոլդովայի դատախազությունը կարգադրել է ազատ արձակել ուկրաինացի պատգամավորին։

Հունիսի 5-ին Մոլդովայի սահմանային ոստիկանությունը Բելառուսի խնդրանքով ձերբակալել էր Յակովենկոյին։ Մոլդովայի սահմանապահ ծառայությունը նշել է, որ ուկրաինացի պատգամավորին Բելառուսը ներառել է «Ինտերպոլի» հետախուզվողների բազայում։ Նրանք հավելել են, որ Յակովենկոն մեղադրվում է կաշառակերության և կոռուպցիայի մեջ։ Այդ ժամանակվանից ուկրաինացի պատգամավորը գտնվում է քննչական մեկուսարանում։