Պուտինը հայտարարել է, թե Պետրոս Առաջինի նման «կվերադարձնի հողերը»

ՌԴ նախագահ Վլադիմիր Պուտինը համոզված է, որ ժամանակակից Ռուսաստանի դերն ինքնիշխանությունն ու տարածքները «վերադարձնելն ու ամրապնդելն է»։

«Դատելով ամեն ինչից, ի վերուստ մեզ տրվել է վերադարձնել ու ամրապնդել (հողերը-խմբ.), և եթե ելնենք նրանից, որ մեր գոյության հիմքում ընկած են այս հիմնարար արժեքները, ապա, անշուշտ, կհաջողվի լուծել մեր առջև ծառացած խնդիրները»,- ասել է նախագահը հինգշաբթի օրը երիտասարդ ձեռներեցների հետ հանդիպման ժամանակ՝ զուգահեռներ տանելով Պետրոս Առաջինի դարաշրջանի հետ, փոխանցում է ՏԱՍՍ-ը։

Ռուսական պետության ղեկավարը նաև ընդգծել է, որ Հյուսիսային պատերազմի տարիներին Պետրոս I-ը Շվեդիայից ոչինչ չի խլել, «վերադարձրել է»։

«Պետրոս I-ը 21 տարի Հյուսիսային պատերազմ է մղել: Թվում էր, թե նա կռվել է Շվեդիայի հետ և ինչ-որ բաներ է պոկել։ Բայց նա ոչինչ չի պոկել, նա վերադարձրել է»,- ասել է Պուտինը՝ հստակեցնելով, որ խոսքը վերաբերում է «ամբողջ Լադոգայի տարածքին, որտեղ այսօր հիմնադրված է Պետերբուրգը»։

ՌԴ նախագահը նաև խոստացել է չկանգնել «նույն փոցխի վրա, ինչ ԽՍՀՄ-ը», և որ ռուսական տնտեսությունը կմնա բաց։