«Ադրբեջանի և Հայաստանի սահմանը սահմանազատված չէ, ուստի «սահմանի որևէ խախտման» մասին դժվար է խոսել». Ղազախստանի փոխվարչապետ

Չորեքշաբթի Համաշխարհային և ավանդական կրոնների համագումարի շրջանակում Ղազախստանի փոխվարչապետ, ԱԳ նախարար Մուխթար Թլեուբերդին նշել է, թե պետք է ելնել այն հանգամանքից, որ Ադրբեջանի և Հայաստանի միջև սահմանը սահմանազատված չէ, ուստի «սահմանի որևէ խախտման մասին դժվար է խոսել»։ Արտգործնախարարի խոսքով՝ այսօր առաջնահերթ խնդիրը հայ-ադրբեջանական սահմանի սահմանազատման և սահմանագծման համատեղ հանձնաժողովի աշխատանքի վերսկսումն է, և Ղազախստանը պատրաստ է կիսվել իր փորձով։ «Մենք պատրաստ ենք կիսվել մեր փորձով։ Քանի որ մենք սահմանազատել ենք մեր սահմանը ցամաքային և նույնիսկ ծովային սահմանի ողջ պարագծով, ապա սահմանագծումը գրեթե ավարտված է բոլոր պետությունների հետ, բացի Ռուսաստանից։ Ռուսաստանի հետ, հավանաբար, մեզանից ևս 2-3 տարի կպահանջվի սահմանազատման համար»,- հավելել է Թլեյբերդին: