Զենքին նվիրված բացառիկ ցուցադրություն՝ պատմության թանգարանում

Ռազմական պատմաբան Արմեն Այվազյանը գրառում է կատարել իր էջում. «Հայաստանի պատմության թանգարանում հայկական զենքին նվիրված մի բացառիկ ցուցադրություն են կազմակերպել։
Բազմաթիվ տպավորիչ ցուցադրանմուշների մեջ առանձնանում էր 17-րդ կամ 18-րդ դարում պատրաստված այս պողպատե ընտիր երկսայրի թուրը, որը թանգարան է բերվել Ս. Էջմիածնից 1930-ական թթ. սկզբին։ Թե այն ինչպե՞ս և որտեղի՞ց է հայտնվել Մայռ Աթոռում՝ առայժմ հայտնի չէ։ Այս ուղղությամբ արժի պրպտումներ կատարել ինչպես Ս. Էջմիածնի գանձերին նվիրված գրականության մեջ և տարատեսակ այցելուների հուշերում, այնպես էլ Մատենադարանի կաթողիկոսական դիվանում։ Այս թուրը 17-18-րդ դարերի հայ զինագործության պահպանված եզակի նմուշներից է, թերևս՝ ամենից նշանավորը։ Հաճելի անակնկալ էր կից պատին տեսնել «Հայ զինվորականության պատվո վարքականոնի» գլխավոր դրույթները՝ քաղված իմ համանուն գրքից։
Բոլորին խորհուրդ եմ տալիս այցելել այս հրաշալի ցուցահանդեսը։ Ի դեպ, կողքի սրահում գործում է Քարե դարին նվիրված մեկ ուրիշ շատ հետաքրքիր ցուցադրություն, որտեղ դրված է նաև աշխարհի ամենահին կաշվե կոշիկը՝ և՛ բնօրինակը, և՛ ժամանակակից վերականգնումը։
Հ. գ. Առհասարակ, անհրաժեշտ է ստեղծել Հայոց ռազմական պատմության մի առանձին մեծ թանգարան, ինչի մասին քանիցս խոսել եմ»։