«Ինչո՞վ են արժեքավոր այս երկու աշխատությունները՝ հատկապես հիմա». Աննա Կոստանյան

Երևանում տեղի է ունեցել թյուրքագիտական երկու նոր գրքերի շնորհանդեսը։ Միջոցառման առաջին մասում ներկայացվել է թուրքագետ, պ.գ.դ., պրոֆեսոր Ռուբեն Մելքոնյանի ««Խաղաղության դարաշրջանի» գաղափարախոսական սահմանադրությունը. (Ժիրայր Լիպարիտյանի «Հայաստան-Թուրքիա. պետականություն, պատմություն, քաղաքականություն» գրքի թուրքագիտական գրախոսություն)» աշխատանքը։
Իսկ շնորհանդեսի երկրորդ մասում ներկայացվել է ««Ատելության խոսքի» դասական թիրախները. հայերն ու Հայաստանը թուրքական և ադրբեջանական մեդիա դաշտում 2019-2021 թվականներին» կոլեկտիվ մենագրությունը, որի հեղինակներն են թուրքագետներ Նաիրա Պողոսյանը (բ.գ.թ.), Վարուժան Գեղամյանը (պ.գ.թ.), Մարիամ Մելքոնյանը և Արեն Պետունցը։

«Ինչո՞վ են արժեքավոր այս երկու աշխատությունները, հատկապես հիմա. քանի որ հայ հասարակությունը իշխանության ազդեցությամբ գտնվում է վտանգավոր մոլորության ու կեղծ խաղաղասիրական թմբիրի մեջ, խիստ կարիք կա իրատեսորեն ծանոթացնելու հայերի հանդեպ թուրք-ադրբեջանական թշնամական քաղաքականության նախկին ու ներկա վտանգներին, սպառնալիքներին, և հայ որոշ գործիչների ու քաղաքական դերակատարների կողմից իրական սպառնալիքները թաքցնելու փորձերով հակահայ քաղաքականությանը նպաստելու և հայ հասարակությանն ապակողմնորոշելու փաստերին»,- նշել է նախկին պատգամավոր Աննա Կոստանյանը: