«ԵՄ-ն պետք է Բաքվի հետ համակարգի Հայաստան առաքելություն ուղարկելու հարցը». Բայրամով

Ադրբեջանի հետ չսահանազատված սահմանին Եվրոմիության՝ Հայաստան նոր առաքելություն ուղարկելու հարցը պետք է համաձայնեցվի Բաքվի հետ, մամուլի ասուլիսում ասել է Ադրբեջանի արտգործնախարար Ջեյհուն Բայրամովը։

Նրա խոսքով, ներկայում ընթանում է հաջորդ առաքելության պլանավորումը, և Ադրբեջանը պետք է տեղեկացված լինի դրա առաջադրանքների և ընդգրկման աշխարհագրության մասին։

«Այո, այն կուղարկվի Հայաստան, սակայն այդ հարցը վերաբերում է Ադրբեջանի շահերին»,- ասել է նախարարը։ Միաժամանակ նա նշել է, որ Ադրբեջանը դեռևս ոչ մի զեկույց չի ստացել ԵՄ նախորդ առաքելության վերաբերյալ։

Հակառակորդի ԱԳՆ ղեկավարն ընդգծել է, որ ԵՄ-ն քաջատեղյակ է այս հարցում Ադրբեջանի բաց դիրքորոշման մասին, ուստի Բաքվի հետ պետք է լինի տեղեկատվության փոխանակում և համակարգման գործընթաց։