Ադրբեջանը բողոքի նոտա է հղել Ֆրանսիային

Ադրբեջանում Ֆրանսիայի դեսպան Անն Բուլյոնը չորեքշաբթի կանչվել է Ադրբեջանի արտաքին գործերի նախարարություն։ Նրան հանձնվել է բողոքի նոտա՝ ուղղված Ֆրանսիայի Եվրոպայի և արտաքին գործերի նախարարությանը: Պատճառը Ֆրանսիայի մի շարք քաղաքական կուսակցությունների ներկայացուցիչների՝ նախագահ Էմանուել Մակրոնին Ադրբեջանի տարածք ներխուժելու կոչն է։ Այս մասին ասված է հակառակորդ երկրի արտաքին գործերի նախարարության պաշտոնական կայքում հրապարակված հաղորդագրության մեջ։

«Հանդիպման ընթացքում խոր մտահոգություն է արտահայտվել Ֆրանսիայի տարբեր քաղաքական ուժերի կողմից Ադրբեջանի նկատմամբ բացահայտ զրպարտության և նախապաշարմունքի վրա հիմնված արշավի շարունակման և ընդլայնման առնչությամբ։

ԱԳՆ-ն ընդգծել է, որ Ադրբեջանին ուղղված անհիմն մեղադրանքները, որոնք նշված են Ֆրանսիայի խորհրդարանում ներկայացված քաղաքական ուժերի առաջնորդների անունից Ֆրանսիայի նախագահին ուղղված նամակում, «ոչ այլ ինչ են, քան ոտնձգություն Ադրբեջանի ինքնիշխանության և տարածքային ամբողջականության նկատմամբ»,- ասված է Ադրբեջանի ԱԳՆ-ի հայտարարության մեջ:

Ադրբեջանական կողմը ուշադրություն է հրավիրել համապատասխան միջոցներ ձեռնարկելու անհրաժեշտության վրա՝ անմիջապես դադարեցնելու Ֆրանսիայի կառավարության արշավը Ադրբեջանի դեմ։