«Եթե հայկական բանակը հզոր լինի, ադրբեջանցիները երբեք չեն համարձակվի միջանցքը փակել»․ ՔՊ-ական պատգամավոր

«Այս պահին ունենք դիսբալանս Ադրբեջանի ռազմական ուժի հետ համեմատած, և Ադրբեջանն օգտվում է այդ հնարավորությունից։ Եթե հայկական բանակը հզոր լինի, ադրբեջանցիները երբեք չեն համարձակվի այդ միջանցքը փակել, որովհետև այդ դեպքում ուժով կբացվի միջանցքը, քանզի դա մարդու իրավունքների կոպտագույն խախտում է»,- այս մասին 24News-ի հետ զրույցում ասել է ԱԺ ՔՊ խմբակցության պատգամավոր Սերգեյ Բագրատյանը՝ անդրադառնալով Լաչինի միջանցքում ստեղծված իրավիճակին:
Ըստ նրա՝ խնդրի կարգավորման համար ՀՀ-ում հավատարմագրված բոլոր դեսպանները պետք է դատապարտող հայտարարություններ ստանան իրենց երկրներից։ Իսկ ՄԱԿ-ի ԱԽ-ի դատապարտումը պետք է գործողության վերածվի․ հայտարարություններին պետք է հետևեն Ադրբեջանի նկատմամբ պատժամիջոցները:
Պատգամավորի համոզմամբ՝ ռուս խաղաղապահները լիարժեք իրավունք ունեին թույլ չտալ, որ «բնապահպանները» միջանցքում հավաքվեին․ «Իրենք կոչված են հենց դրա համար, խաղաղապահ առաքելության այլ նպատակ չկա: Չի բացառվում, որ Ռուսաստանն իր հաշվարկների մեջ համարում է, որ հնարավոր ռիսկեր կան, այսինքն՝ երկրորդ ճակատի բացում»,- նշել է նա։