Կալանավորվել է «Մեյմանդարի շուկայում» 1 հոգու սպանած, 1 հոգու էլ դանակահարած կասկածյալը

230

Կիրակի, 22 հունվարի, 2023 թ., 18:24

Օրեր առաջ միջնորդություն էր ներկայացվել Արմավիրի մարզի ընդհանուր իրավասության դատարանի Վաղարշապատի նստավար, որպեսզի դատարանը՝ որպես խափանման միջոց, երկամսյա կալանքի որոշում կայացնի հունվարի 15-ին Գայի գյուղում՝ ժողովրդին հայտնի «Մեյմանդարի շուկայում» Լոռու մարզի բնակիչ՝ 50-ամյա Սարգիս Ա-ին սպանելու և Լոռու մարզի բնակիչ՝ 29-ամյա Արթուր Հ-ին մարմնական վնասվածքներ պատճառելու կասկածանքով ոստիկանների կողմից տաք հետքերով հայտնաբերված կասկածյալ՝ Արմավիրի մարզի բնակիչ, 56-ամյա Անդրանիկ Կ-ի նկատամբ։

Ինչպես հայտնում է ֆոտոլրագրող Գագիկ Շամշյանը, դատավոր Հրաչյա Մեխակյանը, դռնփակ դատական նիստն անցկացնելուց ու խորհրդակցական սենյակից վերադառնալով, բավարարել է քննիչի միջնորդությունը և Անդրանիկ Կ-ն վերցվել է կալանքի ու դատարանից տեղափոխվել ՀՀ արդարադատության նախարարության քրեակատարողական ծառայության «Արմավիր» ՔԿՀ։
Հունվարի 15-ին սպանություն էր տեղի ունեցել Արմավիրի մարզում։Ժամը 19։00-ից 19։10 ընկած ժամանակահատվածում ոստիկանության Վաղարշապատի բաժին օպերատիվ տեղեկություններ էին ստացվել, որ Գայի գյուղում՝ ժողովրդին հայտնի «Մեյմանդարի» շուկայում, վիճաբանություն է տեղի ունեցել և ըստ օպերատիվ տեղեկությունների, կային տուժածներ։
Դեպքի փաստով Դ․ Բարոյանի որոշմամբ ստեղծվել էր քննչական խումբ, որտեղ էլ նախաձեռնվել էր քրեական վարույթ։