Ուրբաթ, 03 փետրվարի, 2023 թ.
|
Ստեփանակերտում`   +2 °C

Փայտի և վառարանի ձեռքբերման համար Ստեփանակերտի քաղաքապետարանում ընդունվում են դիմումներ

Փայտի և վառարանի ձեռքբերման համար Ստեփանակերտի քաղաքապետարանում ընդունվում են դիմումներ
222
Երեքշաբթի, 24 հունվարի, 2023 թ., 19:48

Բոլոր այն քաղաքացիները, ովքեր ունեն վառելափայտի կամ վառարանի անհրաժեշտություն, կարող են դիմել Ստեփանակերտի քաղաքապետարան:

Այս մասին տեղեկացրել է Ստեփանակերտի քաղաքապետի առաջին տեղակալ Սամվել Ղուլյանը:

«Դիմումներն ընդունելուց հետո ստուգվում է՝ արդյո՞ք, տվյալ դիմումատուն ունի փայտի կամ վառարանի անհրաժեշտություն: Եղել է դեպք, փայտի համար դիմել են ու պարզվել է, որ քաղաքացին փայտի կարիք չունի»,- նշել է Սամվել Ղուլյանը:

Նրա հաղորդմամբ՝ դիմումատուների ցանկն այնուհետև ուղարկվում է ԱՀ Ջրային կոմիտե:

«Քաղաքապետարանի կողմից բավարարված հայտերի հիման վրա «Ջրային տնտեսություն» ՓԲԸ-ի կողմից տրամադրվում է վառելափայտ և վառարան»,- «Արցախկերտ»-ի հետ զրույցում ասել է ԱՀ Ջրային կոմիտեի նախագահ Գեորգի Հայրիյանը:

Նրա տեղեկատվությամբ՝ մեկ դիմումի համար անվճար հիմունքներով 2 խորանարդ մետր վառելափայտ է նախատեսվում:

Դիմումների համար վերջնաժամկետ սահմանված չէ: