Ադրբեջանն այսօր միջպետական ​​արբիտրաժային գործընթաց է սկսել Հայաստանի դեմ՝ փոխհատուցում պահանջելով

2023 թվականի փետրվարի 27-ին Ադրբեջանը միջպետական ​​արբիտրաժային գործընթաց է սկսել Հայաստանի դեմ։

Ինչպես հայտնել են Ադրբեջանի ԱԳՆ-ից, Հայաստանին ներկայացված արբիտրաժային ծանուցման մեջ ադրբեջանական կողմը Հայաստանից ֆինանսական փոխհատուցում է պահանջում 1991-2020 թվականներին Հայաստանի կողմից «Ադրբեջանի տարածքների ապօրինի օկուպացիայի» ընթացքում Ադրբեջանի ինքնիշխան իրավունքների խախտման համար: Նշվել է, որ Հայաստանի կողմից շահագործած ամենամեծ հիդրոէլեկտրակայանը Թերթերի հիդրոէլեկտրակայանն է, որը կառուցվել է Թերթեր գետի վրա գտնվող Սարսանգի ջրամբարի վրա։

Ընդգծվել է նաև, որ «առանց թույլտվության», Հայաստանը կառուցել է առնվազն 37 հիդրոէլեկտրակայան հակառակորդի բնորոշմամբ՝ Ադրբեջանի ինքնիշխան տարածքներում, ինչպես նաև՝ Հայաստանն «անօրինական կերպով շահագործել է Չարդաղլու ածխի հանքավայրը»՝ այնտեղ արդյունահանված ածուխը Երևանի ՋԷԿ-ում օգտագործելու համար։

«Հայաստանը պայմաններ է ստեղծել Ադրբեջանի հիդրոէներգիայի և ածխի պաշարների ապօրինի շահագործման համար՝ Ադրբեջանի տարածքում ստեղծելով լրացուցիչ էներգետիկ ենթակառուցվածք։ «Օրինակ, Հայաստանը ֆինանսավորել է օկուպացված տարածքների և Հայաստանի միջև ածխի փոխադրման նոր մայրուղու կառուցումը, որը բնութագրվում է որպես «կյանքի ուղիղ գիծ» և «էական դեր» կունենա Հայաստանի անվտանգության մեջ։
Հայաստանը ոչնչացրել է Ադրբեջանում առկա էներգետիկ տարանցիկ կայանքները, ինչպիսին է Եվլախը Նախիջևանի հետ կապող գազատարը: Այսպիսով, օկուպացիայի արդյունքում դադարեցվել է Նախիջևան գազամատակարարումը»,- ասվում է հակառակորդի կողմից ներկայացված զեկույցում։