Ռուսաստանն ու Ուկրաինան կրկին գերիներ են փոխանակել

130 ուկրաինացի զինծառայողներ Ուկրաինա են վերադարձել գերիների փոխանակման արդյունքում։

Ուկրաինայի նախագահի աշխատակազմի ղեկավար Անդրեյ Երմակի խոսքով՝ գերությունից ազատվածների թվում կա 126 տղամարդ և 4 կին։

Նրանց թվում են Մարիուպոլի պաշտպանները, այդ թվում՝ Ազովստալը պաշտպանած մարտիկները, ինչպես նաև Բախմուտի և Սոլեդարի տարածքում գերեվարված զինվորականները։ Իր հերթին, Ռուսաստանի Դաշնության պաշտպանության նախարարությունը հայտնել է, որ Ռուսաստան է վերադարձվել 90 ռուս զինծառայող։

«Մարտի 7-ին բանակցային գործընթացի արդյունքում Կիևի ռեժիմի կողմից վերահսկվող տարածքից հետ են վերադարձվել 90 ռուս զինծառայողներ, ովքեր մահացու վտանգի մեջ են եղել»,- ասվում է գերատեսչությունում։

Նրանք նշել են, որ ՌԴ օդատիեզերական ուժերի ռազմատրանսպորտային ինքնաթիռները զինվորական անձնակազմ կհասցնեն Մոսկվա՝ ՌԴ պաշտպանության նախարարության բուժհաստատություններում բուժման և վերականգնման նպատակով։