Ֆրանսիան ընդունեց կենսաթոշակային բարեփոխումների օրենքը

Ֆրանսիայի վարչապետ Էլիզաբեթ Բորնը հայտարարել է կենսաթոշակային տարիքը 62-ից 64-ի բարձրացնելու մասին օրենքի ընդունման մասին։ Դա տեղի է ունեցել այն բանից հետո, երբ նախագահ Էմանուել Մակրոնը որոշել է շրջանցել քվեարկությունն ստորին պալատում։
«Մենք ռիսկի չենք գնաˋ բանավեճերի վրա ժամեր ծախսելով, մենք ռիսկի չենք ենթարկելու մեր կենսաթոշակային համակարգի ապագան։ Այս բարեփոխումն անհրաժեշտ է։ Ես հավատարիմ եմ մեր սոցիալական մոդելին, և այս բարեփոխումը փոխզիջման արդյունք է, որին համաձայնել են խորհրդարանի երկու պալատների օրենսդիրները: Ես պատրաստ եմ պատասխանատվություն կրելու սրա համար»,- մեջբերում է ՌԻԱ Նովոստին նրա խոսքերը։

Պետության ղեկավարը հավանություն է տվել վարչապետի կողմից Սահմանադրության 49.3-րդ հոդվածի կիրառմանը, որը թույլ է տալիս օրենք ընդունել առանց խորհրդարանի հավանության։

Մարտի 12-ին Ֆրանսիայի Սենատն ընդունել է կենսաթոշակային բարեփոխումների մասին օրինագիծը։ Կողմ է քվեարկել 195, դեմ՝ 112 մարդ։

Բողոքի ակցիայի մասնակիցները կրկին հավաքվել են Փարիզի Ազգային ժողովի մոտ՝ արտահայտելու իրենց անհամաձայնությունը բարեփոխումների ընդունման հետ կապված։ Ֆրանսիայում կենսաթոշակային բարեփոխումներն առաջարկել է նախագահ Էմանուել Մակրոնը, ով դրա մասին առաջին անգամ խոսել է 2019թ.: Այդ ժամանակվանից ֆրանսիացիները բողոքի ցույցեր են անում։ Մինչ օրենքն ընդունելը խորհրդարանում, երկրում սկսվել էին գործադուլներ և ցույցեր։