«Բաքվի վարքագիծը վկայում է ԼՂ-ն էթնիկ զտումների ենթարկելու քաղաքականության շարունակելիության մասին». Սարգիս Խանդանյան

Ձեր այցը Հայաստան նոր լիցք կհաղորդի հայ-խորվաթական փոխգործակցության խորացմանը և միջխորհրդարանական հարաբերությունների զարգացմանը. ասել է ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանն ապրիլի 3-ին Խորվաթիայի խորհրդարանի Խորվաթիա-Հայաստան բարեկամական խմբի հետ հանդիպման ժամանակ: Տեղեկանում ենք ԱԺ լրատվության վարչությունից։

Հանձնաժողովի նախագահը նշել է, որ 2024 թվականին լրանում է երկու երկրների միջև դիվանագիտական հարաբերությունների հաստատման 30-ամյակը: Սարգիս Խանդանյանն ընդգծել է, որ այս տարիների ընթացքում հայ-խորվաթական հարաբերությունները հետևողականորեն զարգացել են և հույս հայտնել, որ փոխադարձ ջանքերի շնորհիվ դրանք ավելի կամրապնդվեն և կխորանան:

Խորհրդարանականն անդրադարձել է Ադրբեջանի կողմից Լաչինի միջանցքի ապօրինի շրջափակմանը՝ նշելով. «Այդ գործողությունների հետևանքով ԼՂ բնակիչները մոտ չորս ամիս է՝ զրկված են ազատ տեղաշարժի իրավունքից: ԼՂ-ն կանգնած է պարենային և հումանիտար աղետի վերահաս վտանգի առջև: Ադրբեջանի այս վարքագիծը ոչ միայն ակներև է դարձնում նրա կողմից Լեռնային Ղարաբաղի ժողովրդի իրավունքների և անվտանգության խնդիրը հասցեագրելու և այդ նպատակով Ստեփանակերտի հետ երկխոսելու մտադրության բացակայությունը, այլև հերթական անգամ վկայում է պաշտոնական Բաքվի՝ Լեռնային Ղարաբաղն էթնիկ զտումների ենթարկելու քաղաքականության շարունակականության մասին»:

Սարգիս Խանդանյանը հյուրերին տեղեկացրել է, որ Ադրբեջանի այս գործողությունը դատապարտվել է Եվրոպական խորհրդարանի, բազմաթիվ ազգային խորհրդարանների, ԵՄ, ԱՄՆ և միջազգային հարաբերությունների այլ սուբյեկտների կողմից, սակայն Ադրբեջանը հաշվի չի առնում մեր գործընկերների հորդորները:

Նրա խոսքով Հայաստանը տարբեր միջազգային հարթակներում բարձրաձայնում է Ադրբեջանի դեմ պատժամիջոցների կիրառման անհրաժեշտության մասին և ակնկալում միջազգային գործընկերների հասցեական արձագանքները:

Սարգիս Խանդանյանը Հայաստանի Հանրապետության սահմանների շուրջ կայունությունն ապահովելու տեսանկյունից կարևորել է Եվրոպական միության քաղաքացիական դիտորդական առաքելությունը:

Խորվաթիա-Հայաստան բարեկամական խմբի ղեկավար Դավոր Իվո Շտիրը կարևորել է հայ-խորվաթական հարաբերությունները և նշել. «Խորվաթիան ԵՄ-ում երիտասարդ անդամ է և հաշվի առնելով աշխարհաքաղաքական վերջին զարգացումները՝ մենք կարևորում են տարածաշրջանում խաղաղության հաստատումը»:

Պատվիրակության անդամ Դոմագոյ Հայդուկովիչի խոսքով իրենք կարևորում են հայ ռազմագերիների և գերեվարված այլ անձանց շուտափույթ վերադարձը, ինչպես նաև մտահոգված են Լեռնային Ղարաբաղի՝ Ադրբեջանի վերահսկողության տակ անցած տարածքներում հայկական պատմամշակութային և հոգևոր ժառանգության պահպանման խնդրով:

Հյուրերը շնորհակալություն են հայտնել հանդիպման համար և նշել, որ նման հանդիպումներն ու փոխայցելությունները շարունակական բնույթ կկրեն: